Source: Norrøn Mytologi

Original Source: Norrœn Fornkvæði by Sophus Bugge

The original text was published with copious notes which have not been reproduced here!

 

Synir Hravdvngs konungs.
Hra/dvngr konvngr atti tva sono, het annarr Agnarr, en annarr Geirra/þr. Agnarr var tío vetra, enn Geirra/dr átta vetra. Þeir rero tveir a bati með dorgar sinar at smafisci. Vindr rac þa i haf vt. I natmyrkri brvto þeir við land oc gengo vp, fvndo cotbónda einn; þar voro þeir vm vetrinn. Kerling fostraþi Agnar, enn karl fostraþi Geirroð oc kendi hanom rað. At vári fecc karl þeim scip. Enn er þa/ kerling leiddo þa til strandar, þa melti karl einmeli við Geirra/d. Þeir fengo byr oc qvomo til sta/dva fa/þvr sins. Geirroþr var fram i scipi; hann hlióp vp a land, enn hratt vt scipino oc melti: «Farþv nv þar er smyl hafi þic!» Scipit rac i haf vt. Enn Geirroðr gek vpp til boiar, hanom var þar vel fagnat; enn faþir hans var þa andaþr. Var þa Geirra/ðr til konungs tekinn, oc varð maþr agetr.
Oþinn oc Frigg sato i Hliþsciálfo oc sa vm heima alla. Odinn melti: «Sér þv Agnar fostra þinn, hvar hann elr born við gygi i hellinom? Enn Geirroþr fostri minn er konungr oc sitr nv at landi.» Frigg segir: «Hann er maþniþingr sa, at hann qvelr gesti sina, ef hanom þiccia of margir coma.» Oþinn segir, at þat er in mesta lygi; þa/ vedia vm þetta mál. Frigg sendi escimey sína Fvllo til Geirroðar. Hon bad konung varaz, at eigi fyrgerþi hanom fiolkvnnigr maþr sa er þar var kominn i land; oc sagdi þat marc á, at engi hvndr var sva olmr, at á hann mundi hla/pa. Enn þat var inn mesti hegomi, at Geirroþr konungr veri eigi matgoþr; oc þo letr hann handtaca þann mann, er eigi vildo hvndar a ráða. Sa var i feldi blám oc nefndiz Grimnir og sagði ecci fleíra fra ser, þott hann veri at spvrþr. Konvngr let hann pína til sagna oc setia milli elda tveggia, oc sat hann þar átta netr. Geirroþr konvngr atti þa son tío vetra gamlan, oc het Agnarr eptir broþur hans. Agnarr gecc at Grimni oc gaf hanom horn fvlt at drecca oc sagði, at faðir hans gorði illa, er hann píndi þenna mann sacla/san. Grimnir dracc af; þa var eldrinn sva kominn, at feldrinn brann af Grimni. Hann qvaþ:
1  4	Heitr ertv, hripvþr! oc heldr til micill; gongomc firr, fvni! loði sviþnar, þott ec a lopt berac, brennomc feldr fyr.
2  5	Átta netr sat ec milli elda her, sva at mer mangi mat ne bá/ð, nema einn Agnarr, er einn scal ráða, Geirroþar sonr, Gotna lande.
3  4	Heill scaltv, Agnarr! allz þic heilan biþr Veratyr vera; eins drycciar þv scalt aldregi betri giold geta.
4  4	Land er heilact, er ec liggia se asom oc alfom ner; enn i Þrvðheimi scal Þórr vera, vnz vm rivfaz regin.
5  4	Ydalir heita þar er Vllr hefir ser vm gorva sali; Alfheim Freý gáfo i ardaga tivar at tannfe.
6  4	Bor er sa inn þriði er blið regin silfri þa/cþo sali; Valascialf heitir, er velti ser áss i ardaga.
7  4	Sa/cqvabeccr heitir enn fiorþi, enn þar svalar knego vnnir yfir glymia; þar þa/ Oðinn oc Sága drecca vm alla daga gla/ð or gvllnom kerom.
8  4	Glaðsheimr heitir enn fimti, þars en gvllbiarta Valha/ll við of þrvmir; enn þar Hroptr kýss hverian dag vapnda/þa vera.
9  4	Mioc er a/þkent þeim er til Oþins koma, salkynni at sia; sca/ptom er rann rept, scioldom er salr þakiþr, bryniom vm becki strát.
10  4	Mioc er a/þkent þeim er til Oþins koma, salkynni at sia; vargr hangir fyr vestan dyrr oc drvpir a/rn yfir.
11  4	Þrymheimr heitir enn setti, er Þiazi bió sa inn amátki iotvnn; enn nv Scaði byggvir, scír brvðr goða, fornar toptir fa/ðvr.
12  4	Breiðablik ero in siavndo, enn þar Baldr hefir ser vm gerva sali; a þvi landi er ec liggia veit fosta feícnstafi.
13  4	Himinbiorg ero en atto, enn þar Heimdall qveþa valda veom; þar vorþr goða dreccr i vero ranni glaþr inn góða mioþ.
14  4	Folcvangr er inn nivndi, enn þar Freyia reþr sessa costom i sal; halfan val hon kyss hverian dag, enn halfan Oðinn á.
15  4	Glitnir er inn tivndi, hann er gvlli stvddr oc silfri þacþr iþ sama; enn þar Forseti byggir flestan dag oc svefer allar sacir.
16  4	Nóatvn ero en ellipto, enn þar Niorþr hefir ser vm gorva sali; manna þengill enn meinsvani hatimbroþom ha/rgi reðr.
17  4	Hrísi vex oc há grasi Viðars land Viði; en þar mavgr of lezc af mars baki frocn at hefna fa/þvr.
18  4	Andhrimnir letr i Eldhrimne Sehrimni sodinn: flesca bezt, enn þat fáir vito, við hvat einheriar alaz.
19  4	Gera oc Freca seðr gvnntamiþr hroþigr Heriafa/ðr; enn viþ vín eitt vapnga/fvgr Oðinn e lifir.
20  4	Hvginn oc Mvninn flivga hverian dag iormvngrvnd yfir; ovmc ec of Hvgin, at hann aptr ne comiþ, þo siámc meirr vm Mvnin.
21  4	Þytr þvnd, vnir þióþvitnis fiscr floði í; árstra/mr þickir ofmicill Valgla/mni at vaþa.
22  4	Valgrind heitir, er stendr velli á heilog fyr helgom dvrom; forn er sv grind, enn þat fáir vito, hve hon er i lás vm lokin.
23  4	Fimm hvndrvþ dvra oc vm fiorom togom, sva hygg ec á Valha/llo vera; átta hvndrvþ eínheria ganga senn or einom dvrom, þa er þeir fara við vitni at vega.
24  4	Fimm hvndrvþ golfa oc vm fiorom togom, sva hygg ec Bilscirni meþ bvgom; ranna þeirra, er ec rept vita, míns veit ec mest magar.
25  4	Heiþrvn heitir geit, er stendr ha/llo a † Heriafa/drs oc bitr af Leraþs limom; scapker fylla hon scal ins scíra miaðar, knaat sv veig vanaz.
26  4	Eikþyrnir heitir hiortr, er stendr a ha/llo † Heriafa/þrs oc bítr af Leraþs limom; enn af hans hornom drypr i Hvergelmi, þaðan eigo votn a/ll vega.
27  4  9	Siþ oc Víþ, Sekin oc Ekin, Sva/l oc Gvnnþró, Fiorm oc Fimbvlþvl, Rín oc Rennandi, Gipvl oc Ga/pvl, Ga/mvl oc Geirvimvl, þer hverfa vm hodd goða; Þyn oc Vin, Þa/ll oc Ha/ll, Graþ oc Gvnnþorin.
28  4  8	Vína heitir enn, a/nnor Vegsvinn, þriðia Þiodnvma; Nyt oc Na/t, Na/nn oc Hra/nn, Sliþ oc Hríþ, Sylgr oc Ylgr, Víþ oc Ván, Va/nd oc Stra/nd, Gia/ll oc Leiptr, þer falla gvmnom ner, en falla til heliar heðan.
29  4  7	Ka/rmt oc Avrmt oc Kerla/gar tver, þer scal Þorr vaða dag hvern, er hann doma ferr at asci Yggdrasils; þviat asbrv brenn a/ll loga, heilog votn hlóa.
30  4  7	Glaþr oc Gyllir, Gler oc Sceiðbrimir, Silfrintoppr oc Sinir, Gísl oc Falhofnir, Gvlltoppr oc Lettfeti, þeim ríða esir ióm dag hvern, er þeir doma fara at asci Yggdrasils.
31  4	Þriár rotr standa a þria vega vndan asci Yggdrasils: Hel býr vnd einni, annarri hrimþvrsar, þriðio mennzkir menn.
32  4	Ratatoscr heitir ikorni, er renna scal at asci Yggdrasils: arnar orð hann scal ofan bera oc segia Níþha/ggvi niþr.
33  4	Hirtir ero oc fiorir, þeirs af hefingar á gaghalsir gnaga: Dainn oc Dvalinn, Dvneyrr oc Dvraþrór.
34  4  7	Ormar fleiri liggia vnd asci Yggdrasils, enn þat vf hyggi hverr osviþra apa: Goinn oc Moinn, þeir ’ro Grafvitnis synir, Grabacr oc Grafva/llvþr, Ofnir oc Svafnir, hygg ec, at e scyli meiþs qvisto má.
35  4	Ascr Yggdrasils drygir erfiði meira en menn vm viti: hiortr bítr ofan, enn a hliþo fvnar, scerþer Níðha/ggr neþan.
36  4  7	Hrist oc Mist vil ec at mer horn beri, Sceggia/ld oc Sca/gvl, Hildr oc Þrvðr, Hla/cc oc Herfiotur, Ga/ll oc Geira/nvl, Randgriþ oc Raþgriþ oc Reginleif; þer bera einheriom a/l.
37  4	Arvacr oc Alsviþr þeir scolo vpp heðan svangir sol draga; enn vnd þeirra bógom fálo bliþ regin, esir, isarn kol.
38  4	Svalinn heitir, hann stendr solo fyr, scioldr, scinanda goði; biorg oc brim ec veit at brenna scolo, ef hann fellr ifrá.
39  4	Sca/ll heitir vlfr, er fylgir eno scírleita goði til varna viðar; enn annarr Hati, hann er Hroþvitnis sonr, sa scal fyr heiða brvði himins.
40  4	Ór Ymis holdi var iorþ vm sca/pvð, enn or sveita sær, biorg or beinom, baðmr or hári, en or ha/si himinn.
41  4	Enn or hans brám gerðo blið regin Miðgard manna sonom; enn or hans heila varo þa/ in harðmoðgo scy a/ll vm sca/pvþ.
42  4	Vllar hylli hefr oc allra goða hverr er tecr fyrstr a fvna; þviat opnir heimar verþa vm ása sonom, þa er hefia af hvera.
43  4	Ivalda synir gengo i ardaga Sciþbladni at scapa, scipa bezt, scirom Frey, nytom Niarðar bvr.
44  4  7	Ascr Yggdrasils hann er oztr viþa, en Sciþblaþnir scipa, Odinn asa, enn ioa Sleipnir, Bilra/st brva, en Bragi scalda, Habroc ha/ca, en hvnda Garmr.
45  4	Svipom hefi ec nv ypt fyr sigtiva sonom, viþ þat scal vilbiorg vaca; a/llom asom þat scal inn coma Egis becci á, Ægis drecco at.
46  4	Hetomc Grimr, hetomc Gangleri, Herian oc Hialmberi, Þeccr oc Þriði, Þvðr oc Vþr, Helblindi oc Hár.
47  4	Saþr oc Svipall oc Sanngetall, Herteitr oc Hnicarr, Bileygr, Baleygr, Ba/lvercr, Fiolnir, Grimr oc Grimnir, Glapsviþr oc Fia/lsviþr,
48  5	Siþha/ttr, Siþsceggr, Sigfa/ðr, Hnicvþr, Alfa/þr, Valfa/þr, Atríðr oc Farmatyr; eino nafni hetomc aldregi, siz ec meþ folcom fór.
49  4  8	Grimne mic héto at Geirraðar, enn Ialc at Asmundar, enn þa Kialar er ec kialca dró, Þrór þingom at, Viðvrr at vigom, Osci oc Ómi, Iafnhár oc Biflindi, Ga/ndlir oc Harbarðr meþ goðom.
50  4	Sviþvrr oc Sviþrir er ec het at Sa/ccmimis, oc dvlþa ec þann inn aldna iotvn, þa er ec Miþviþnis varc ins mora bvrar ordinn einbani.
51  4	Avlr ertv, Geirroþr! hefr þv ofdrvccit, miclo ertv hnvgginn, er þv ert mino gengi, ollom einheriom oc Oþins hylli.
52  4	Fiolþ ec þer sagðac, enn þv fatt vm mant, of þic vela vinir; meki liggia ec se mins vinar allan i dreyra drifinn.
53  4	Eggmoþan val nv mvn Yggr hafa, þitt veit ec líf vm liþit; vvar ’ro disir, nv knattv Oðin siá; nalgaztv mic, ef þv megir!
54  4  7	Oþinn ec nv heiti, Yggr ec áþan het, hetvmc Þvndr fyrir þat: Vacr oc Scilfingr, Váfvþr oc Hroptatýr, Ga/tr oc Ialcr meþ goðom, Ofnir oc Svafnir, er ec hygg at orðnir se allir af einom mer.
Geirroþr konvngr sat oc hafði sverþ vm kne ser oc brvgðit til miþs. Enn er hann heyrþi, at Oðinn var þar kominn, þa stoþ hann vpp oc vildi taca Oðin fra eldinom. Sverþit slapp or hendi hanom, oc visso hioltin niþr; konvngr drap foti oc steyptiz afram, enn sverþit stoð igognom hann, oc fecc hann bana. Oþinn hvarf þa. Enn Agnarr var þar konvngr lengi siþan.